Marketpleyslərdəki uğurunu dəstəkləyəcək 8 məsləhət

Bu gün sahibkarlar üçün ən böyük fürsətlərdən biri marketpleyslərdə məhsullarını tanıtmaq və satmaq fürsətidir. Burada uğurlu olmaq üçün isə sadəcə yaxşı məhsul kifayət etmir. Hansı platformadan başlamaq, marketi təhlil etmək və diqqət edilməli məqamları əvvəlcədən bilmək vacibdir.

Bu məqaləmizdə də məhz marketpleyslərdə satışını artırmaq istəyən sahibkarlar üçün 8 bərəkətli məsləhətimiz var.

Araşdırmalara görə, bir biznes nə qədər çox marketpleysdə özünü göstərirsə, o qədər də uğurludur. Hə, əvvəlcə bir platformadan başlamaq lazımdır, amma getdikcə bunların sayını artırmaq da mütləqdir. Beləcə, hər marketpleys biznesin uğurunu 2, hətta 3 dəfə artıra bilər.

Birinci marketpleysini seçmək üçün hər birinin şərtləri ilə tanış olmalı, riskləri dəyərləndirməli və büdcənə uyğun seçim etməlisən. Təəssüf ki, hazırda Azərbaycanda marketpleyslərin sayı çox az olsa da, xarici bazarda alternativlərin çoxdur.

Marketpleyslərlə rahat işləmək və uğurlu nəticə əldə etmək üçün aşağıdakı 3 addımı nəzərə almalısan:

• Platformanın şərtlərini oxu: Marketpleyslər satıcının üzləşəcəyi bütün detalları, yəni komissiyaları, bağlama qaydalarını və cərimələri öz veb-saytlarında yerləşdirirlər.
• Xərcləri hesabla və riskləri təhlil et: Şərtlərlə tanış olduqdan sonra hansı platformanın qiymətlərinin məhsullarını satmaq üçün sərfəli olub-olmadığını rahatlıqla görəcəksən. Bu, marketpleysləri müqayisə etmək və ən yaxşı variantı seçmək üçün işinə yarayacaq.
• Məhsulların çatdırılması ilə bağlı tələbləri öyrən: Məsələn, bəzi platformalar iriölçülü məhsulları qəbul etmir. Odur ki bu tələbləri öncədən bilmək işlərini yoluna qoymaqda sənə kömək edəcək.

Biznesin və məhsulların üçün ideal platformaları seçdikdən sonra hamısında satış etməyə başla. Əgər hansısa sənə sərf etməsə, istədiyin vaxt oranı tərk edə bilərsən. Həmçinin tək marketpleysə güvənmək təhlükəlidir, çünki gözləmədiyin anda bağlansa və ya şərtləri dəyişsə, nə edəcəksən?

Marketpleys xərcləri ilə yanaşı, qablaşdırılma və çatdırılma xərclərini də minimuma endirməyə çalış. Belə ki, burada hər qram, hər santimetr önəm daşıyır.

Məsələn, sən qalın qış geyimlərini iri qutularda satırdın və bu həm anbarda yer tuturdu, həm də çatdırılma xərclərini artırırdı. İndi isə vakumlu bağlamalara keçmisən və gödəkcənin həcmini, üstəlik, çatdırılma xərclərini azalda bilmisən.

Marketpleyslərdə istədiyin kateqoriyada məhsulu yerləşdirməkdə, satmaqda və eksperimentlər aparmaqda azadsan. Əgər bir məhsul uğursuzdursa, həmin kateqoriyadan başqa məhsulu önə çıxar və müqayisə et.

Məhsulları dəyişməklə yanaşı, kateqoriya çeşidliliyini də artırmalısan. Məsələn, mətbəx ləvazimatları satırsansa, bunu genişləndirib ev üçün digər kateqoriyada məhsulların satışını da həyata keçirə bilərsən.

Qiymət rəqabətindən və dempinqdən* qaçmaq üçün bəzi məhsulları bir marketpleysə, digərlərini isə başqa platformalara yerləşdir.

Müştərilər ucuz məhsul alanda qiymətlərə o qədər də fikir vermir, amma bahalı bir məhsul aldıqları zaman bütün marketləri yoxlayır və ən ucuz variantı seçirlər. Buna görə də qiymət balansı vacibdir. Əks halda bir marketpleysdə endirim kampaniyası olanda sən digər marketpleysdəki məhsulun da qiymətini aşağı salmalısan ki, qiymətlər üst-üstə düşsün.

*dempinq — məhsulun qiymətini bilərəkdən çox ucuz qoyaraq bazarda yer tutmaq və rəqibləri sıradan çıxarmaq üsulu

Bir platformada iki fərqli satıcı eyni məhsulu satışa təqdim edib, lakinin birinin rəyləri var, digərinə isə heç rəy yazılmayıb. Sən birinci hansına klikləyərdin?

Satıcı olaraq isə bütün müsbət və mənfi rəylərə cavabsız qalmamağın önəmlidir. Müsbət rəylərə təşəkkür edərək, mənfi rəylərə isə köməklik göstərərək öz imicini yüksəldə bilərsən. Həmçinin müştəri də fikrinin önəm daşıdığını hiss edəcək və məhsulla bağ yaradacaq.

Əgər bir məhsulun satışları kəskin şəkildə azalıbsa, həmin məhsulun səhifəsini yoxla, çünki azalmanın səbəblərindən biri də məzmunun köhnəlməsi ola bilər. Məzmun dedikdə məhsulun açıqlamasını, haqqında olan mətni və təqdimatını nəzərdə tuturuq.

Tövsiyə edirik ki, məhsul səhifələrində zəngin məzmundan: keyfiyyətli video və fotolardan, yaradıcı mətnlərdən istifadə edəsən.