GUNAH
Xan Cəfərli və Müseyib Qasımov — Təsisçilər

Xan Cəfərli və Müseyib Qasımov Azərbaycan küçə dəbini fərqli istiqamətə aparmaq, mədəniyyəti və geyimi bir ideya ətrafında birləşdirmək məqsədilə 2021-ci ildə "GUNAH" brendinin əsasını qoyublar. Onlarla söhbətimizdə “GUNAH”ın yarandığı günlərdən bugünkü uğurlarına qədər uzanan hekayədən, nostalji dizaynlardan və brendin gələcək planlarından danışdıq.

Xan Cəfərli: Mən qrafik dizaynerəm, amma son zamanlarda daha çox geyim dizaynı ilə məşğulam. 2021-ci ildə Müseyiblə birgə “GUNAH” brendinin əsasını qoymuşuq.

Müseyib Qasımov: Artıq 7-8 ildir ki, filmmeykinq və operatorluqla məşğulam.

Xan Cəfərli: Bu ad mənim sketçlərim arasında var idi. Məmməd Arazın “Nə günah” adlı şeirindən gəlir. Tipoqrafik olaraq maraqlı göründüyündən sketç etmişdim və 2021-də Müseyibin həmin sketçi görməsi sayəsində bunu brendə çevirmək qərarına gəldik. Biznes tərəfinə gəldikdə isə adı qoyanda heç onun uğurlu olub-olmayacağını düşünməmişdik, amma indi görünür ki, uğurludur.

Müseyib Qasımov: Hə, Xanın da dediyi kimi, onun sketçlərinin arasında gördüm bu adı. İlk köynək dizaynlarımızdan birini sketç etmişdi. Mən də çoxdandır bir geyim brendi yaratmağı düşünürdüm. Həmin sketçi görən kimi artıq beynimdə köynəklə dizayn tamamlandı. Yəni adı daha çox dizayna görə seçdik.

Xan Cəfərli: Mənim uşaqlığım şəhərdə keçib və nostalgiyanı çox sevirəm. İstər fotolar olsun, meyxana olsun, küçə stili, insanların ovaxtkı geyimləri və s. Üstəlik, kiril qrafikalı Azərbaycan əlifbasının estetikası məni daha çox ilhamlandırır. Brendi bu estetikaya bağlamağımızın səbəbi də budur. Bir az irəlilədikdən sonra artıq nostaljidən çıxmağı da düşünürsən, amma ruh olaraq nostalgiya həmişə “GUNAH”da olub və olacaq.

Xan Cəfərli: Yeni mövzular, əlbəttə, olacaq. Bizim “runway”* planımız tarixi dövrlər kimi davam edirdi. Məsələn, “Uşaqlığın son gecəsi” nümayişi daha çox 1990-2000-ci illərdən ilhamlanıb. İkinci “runway” olan “Həyatın və sözün rəngləri” 2000-2010-cu illərdən ilhamlanıb. İstəyimiz də budur ki, bunu bir trilogiya kimi davam etdirək. Artıq üçüncü nümayiş Azərbaycanın daha müasir geyim ruhunu daşıyacaq.

Xan Cəfərli: İlk olaraq küçə mədəniyyətini, ardınca isə “screen print” deyə bilərəm. “Screen print” texnikasını ilk dəfə tapmağımız, bunu tətbiq etməyimiz və sonra yaranan brendlərin də buradan ilhamlanması bizim bu mədəniyyətə olan töhfələrimizi göstərir, əslində.

Bunlardan əlavə, nümayişlərimiz, modellərimiz, müxtəlif sənətçilərlə olan əməkdaşlıqlarımızla mədəniyyətə çox dəyər qazandırdığımızı düşünürük.

Müseyib Qasımov: Bir çox modellər var ki, öz karyeralarına məhz “GUNAH” ilə başlayıb.

Xan Cəfərli: “Neftçi” ilə etdiyimiz kollaborasiyamızı ən uğurlu və ən böyük hesab edirəm. Azərbaycanda ilk dəfədir ki, küçə mədəniyyətini təmsil edən bir geyim brendi bir futbol komandası ilə əməkdaşlıq edir. İlk olduğuna görə bizim üçün daha da dəyərlidir.

Xan Cəfərli: “Neftçi” ilə tanışlığımız bu əməkdaşlığa təkan verdi. Dizaynları hazırladıq, görüşdük və təklifimizi etdik. Proses çox uzun çəkdi… Dizaynları dəyişdik, düzəlişlər etdik, yenə dəyişdik, amma axır ki alındı.

Müseyib Qasımov: “Neftçi”nin marketinq komandası da təqdimatımızı çox bəyəndi. Onların bu tip yeniliklərə açıq olması da əməkdaşlığın baş tutmasında böyük rol oynadı.

Müseyib Qasımov: Geyim və dəb sahəsində ən vacib olan məqam geyimləri düzgün vaxtda satışa çıxarmaqdır, yəni yaz/yay geyimləri artıq yaz başlamadan hazır olmalı və satışa çıxmalıdır, eləcə də payız/qış geyimləri. Bunu düzgün etməmək isə satışlara birbaşa olaraq mənfi təsir edir. Bizi də ziyana salan elə bu oldu. Biz vaxtı düzgün planlamırdıq və yaz/yay geyimlərini yay sonuna gecikdirə bilirdik. Düzdür, istehsal problemləri də olurdu, amma hər bir halda bu bizi geridə qoyurdu.

Artıq bu səhvimizdən dərs çıxarmışıq. İndi geciksək, gələn mövsümü gözləyərik və düzgün vaxtda satışa çıxararıq.

Xan Cəfərli: Bizdən əvvəl bu formada fəaliyyət göstərən yerli brend olmadığı üçün bizim üçün bu təcrübələr çox yeni idi. Qeyd etdiyim, “screen print” texnikası da əvvəllər bizə çox çətinliklər yaşadırdı. Heç kimin bu texnika haqqında məlumatı yox idi, bilənlər isə başqa adla tanıyırdı.

Müseyib Qasımov: Çox az fabrik bu texnika ilə istehsal edirdi və onlar da böyük həcmdə geyim sifarişi götürürdü. Üstəlik, materialları necə tapacağımızla bağlı heç kim bizə məlumat vermək istəmirdi. Biz isə özümüz öyrənəndən sonra artıq hamının suallarını cavablayır, kömək olmağa çalışırıq.

Xan Cəfərli: Üstünlük onlayn satışdadır, bəli, amma çalışırıq ki, il boyunca fərqli məkanlarda tədbirlər keçirib öz geyimlərimizi təqdim edək. Maraqlısı da budur ki, həmin tədbirlərdə daha çox satış əldə edirik, çünki insanlar rahatlıqla geyimlərə baxır, toxunur, yoxlaya bilir. Onlayn satışımız həmişə olacaq, amma bu cür tədbirlərə gələcəkdə yenə üstünlük verəcəyik.

Müseyib Qasımov: Öyrəndiyimiz “screen print” texnikası ilə master-klaslar da edirik. Son tədbirimizdə bunu etməyə başlamışıq, amma növbəti tədbirlərdə də olacaq.

Xan Cəfərli: Master-klaslarda tətbiq etdiyimiz dizaynlar da həmin günlərə özəl olur. Dizaynda tarix, məkan kimi detallar yazılır və insanlara xatirə qalır.

Xan Cəfərli: Məhsuldan asılı olur. Bəzi situasiyalarda çox tez satılır, bəzi situasiyalarda isə uğursuzluqla üzləşirik. Bazar bir az qəribədir, amma artıq təxmini öyrənirik ki, nələr satıla bilər, nələr yox.

Müseyib Qasımov: Qlobal ilə müqayisə etsək, əslində, bizim çıxardığımız bütün məhsullar limitli saydadır.

Xan Cəfərli: Hə, Azərbaycan üçün çoxdur. Bizdə alış səviyyəsi aşağıdır. Məsələn, veb-sayt hazırlamışıq və məhsullarımız orada satışdadır. Amma sifarişlər daha çox “Instagram” üzərindən gəlir, nəinki veb-sayt.

Xan Cəfərli: Məncə, gələcəkdə də ilkləri etməyə və yeni əməkdaşlıqlara davam edəcəyik. İdmançılar, komandalar, musiqiçilər və sənətçilərlə əməkdaşlıqlar bizə daha maraqlı gəlir. İnvestisiya təkliflərinə də açığıq, əlimizdə real məhsullarımız, alıcı kütləmiz və ideyalarımız var. Sadəcə bir az vaxt tələb edir, amma sıfırdan başladığımızı nəzərə alsaq, xeyli inkişaf etmişik.

Gələcəkdə də məqsədimiz xarici bazarlara çıxmaq, yeni əməkdaşlıqlar etmək və insanlara maraqlı məhsullar təqdim etməkdir.

Uğurlu biznes dəyər yaratmalıdır. Dəyər yaratmayan biznes gələcəkyönümlü ola bilməz.